Skip to content

சுனாமியாய் எழும் சிறுவர் பாலியல் புகார்கள்… மன்னிப்பு கேட்ட போப்!

ஜூன் 21, 2010

PopeBenedictXVI_Getty__uig_16-9_340x191.jpg

ரோமானிய ஆட்சிக் காலத்திலிருந்தே கத்தோலிக்க தேவாலயங்களுக்கு கட்டற்ற அதிகாரத்தையும் யாரும் ஏன் என்ற கேள்வி எழுப்ப முடியாத புனிதத் தன்மையையும் கொடுத்துவிட்டார்கள். காரணம் அவர்களை இறைவனின் நேரடிப் பிரதிநிதிகளாகவும் அவர்களுக்கு இறைத்தன்மை முழுமையாக இருப்பதாகவும் மன்னர்கள் நம்பினார்கள்.

அன்றைக்கு ஆட்சி முறையே தேவாலயங்கள் – அரண்மனை – படைகள் – மக்கள் என்றுதான் இருந்தது. அதாவது மன்னனுக்கும் மேல் குருமார்களை வைத்திருந்தார்கள். எனவே தேவாலய குருமார்களின் தவறுகள் எக்காலத்திலும் முன்னிறுத்தப்பட்டதே இல்லை.

கத்தோலிக்க கிறிஸ்தவ சமூகம் வாடிகன் போப்பின் ஆட்சி அதிகாரத்துக்குள் வருகிறது. இதுவரை எந்த போப் ஆண்டவரும், தங்கள் அதிகாரத்துக்குக் கீழ் வரும் பிஷப்கள், பாதிரிமார்களின் தவறுகளை கண்டித்தோ தண்டித்தோ யாரும் பார்த்திருக்க – கேள்விப்பட்டிருக்க முடியாது. சிறுவர்களை சில பாதியார்கள் தொடர்ந்து செக்ஸ் தொந்தரவுக்கு உட்படுத்துவதாக அமெரிக்கா, ஜெர்மனி, இந்தியா உள்ளிட்ட பல்வேறு நாடுகளிலும் குற்றச்சாட்டுகள் முன் வைக்கப்பட்டன. ஆனால் மதத்தின் போர்வையில் இவை மூடி மறைக்கப்பட்டே வந்தன.

காரணம் பாதிக்கப்பட்டவர்களின் துயரங்களை விட, அந்த துயரத்தை விளைவித்த பாதிரியார்களைக் காப்பதிலேயே வாடிகன் குறியாக இருந்தது என்பார்கள்.

இப்போது முதல் முறையாக ஒரு பெரும் குற்றத்தை, கிறிஸ்தவம் மட்டுமல்ல.. வேறு எந்த மதமும் சட்டமும் மக்களும் ஒப்புக் கொள்ள முடியாத சிறுவர் பாலியல் குற்றச்சாட்டை வாடிகன் ஒப்புக் கொண்டுள்ளது. தனது கட்டுப்பாட்டிலுள்ள சில நாடுகளின் தேவாலயங்களில் சிறுவர்கள் பாலியல் ரீதியாக துன்புறுத்தப்படுவது உண்மைதான் என்பதை போப் 16வது பெனடிக்ட் இப்போது ஒப்புக் கொண்டுள்ளார்.

காரணம், பாதிக்கப்பட்டவர்களின் ஓலம், தேவாலய காம்பவுண்டுகளையும் மீறி சட்டத்தின் வாசலுக்கு சென்றுவிட்டதுதான். நாளும் ஒரு நாட்டிலிருந்து, பாதிரிமார்கள் மீது பாலியல் குற்றச்சாட்டு மோசடி தொடர்ந்த வண்ணம் உள்ளது. இரு தினங்களுக்கு முன்பு கூட சென்னை படப்பையில் ஒரு பாதிரியார் 25 சிறுவர்களை பாலியல் துன்புறுத்தலுக்கு உள்ளாக்கினார் என்ற குற்றச்சாட்டின் பேரில் கைது செய்ப்பட்டுள்ளது நினைவிருக்கலாம்.

‘எனவே இந்த செக்ஸ் குற்றச்சாட்டுகள் குறித்து விரிவாக, ஒளிவு மறைவின்றி விவாதித்து, குற்றவாளிகளுக்கு உரிய தண்டனை கொடுக்க வேண்டும்; தேவாலயங்கள் என்பவை ஆண்டவரும் உண்மையும் மட்டுமே குடிகொண்டுள்ள இடங்கள் என்பதை மக்கள் நம்பும்படி செய்ய வேண்டும்’ என பல நாடுகளின் பிஷப்கள் குரல் உயர்த்தியுள்ளனர். இவர்களில் சிலர் போப்புக்கு எதிராகவே சற்று உரக்கப் பேசி வருகின்றனர்.

இதுவரை 300க்கும் மேற்பட்ட சிறுவர் பாலியல் புகார்கள் ஜெர்மனியிலிருந்து மட்டுமே வந்துள்ளன. அயர்லாந்து நாட்டில் ஏராளமான சிறுவர்களை இம்மாதிரி பாலியல் தொந்தரவுக்கு பாதிரியார்கள் உள்ளாக்கி வந்தது வெட்ட வெளிச்சமாகியுள்ளது. இந்த சிறுவர்கள் அந்தந்த தேவாலய தலைமைப் பீடத்தால் நடத்தப்படும் பள்ளிகளில் படிப்பவர்கள்.. தேவாலய விடுதிகளிலேயே தங்குபவர்கள். அயர்லாந்து நாட்டின் சார்பில், இது குறித்து ஒரு கமிஷன் விசாரித்து அறிக்கை கூட தாக்கல் செய்யப்பட்டுள்ளது.

ஒரு பாதிரியார் மட்டும் நூற்றுக்கும் அதிகமான சிறுவர்களுடன் தகாத உறவு கொண்டதை ஒப்புக் கொண்டுள்ளார். மற்றொரு பாதிரியார், இரண்டு வாரத்துக்கு ஒரு முறை சிறுவர்களுடன் உறவு கொள்வதை, 25 ஆண்டுகளாக செய்து வந்துள்ளதை ஒப்புக் கொண்டுள்ளார்.

இன்னும் ஆஸ்திரியா, நெதர்லாந்து, சுவிட்சர்லாந்து, அமெரிக்கா என பல்வேறு நாடுகளில் கத்தோலிக்க பாதிரியார்கள், பல ஆண்டுகளாக சிறுவர்களுடன் தகாத உறவு வைத்துள்ளது இப்போது ஒரு சுனாமி மாதிரி சமூகத்தின் பார்வைக்கு வந்துள்ளது.

போப் பெனடிக்ட், ஜெர்மனியில் உள்ள முனிச் நகர பிஷப்பாக, 1977ம் ஆண்டு முதல் 1981ம் ஆண்டு வரை பணியாற்றியுள்ளார். அவர், பிஷப்பாக இருந்த கால கட்டத்திலும் வேறு சில பாதிரியார்கள் இது போன்ற சம்பவங்களில் ஈடுபட்டிருந்திருக்கிறார்கள்.

எனவே, “போப் பெனடிக்ட் இச்சம்பவங்களுக்கு மன்னிப்பு கேட்க வேண்டும், தவறு செய்தவர்கள் மீது உரிய நடவடிக்கை எடுக்க வேண்டும்” என, ஜெர்மனி பார்லிமென்ட் கீழ் சபையின் துணை தலைவர் உல்ப்கேங் தியர்ஸ், பெனடிக்ட்டை சந்தித்து கோரிக்கை விடுத்தார்.

சர்ச்சையைக் கிளப்பியுள்ள மன்னிப்புக் கடிதம்…

நாளுக்கு நாள் புகார்கள் அதிகரித்து வந்ததால் இதற்கு தீர்வு காண்பதற்காக கடந்த வாரம் போப் பெனடிக்ட், வாடிகன் தேவாலயத்தின் உயர்மட்ட நிர்வாகிகளுடன் ஆலோசனை நடத்தினார்.

இதைத் தொடர்ந்து பாதிரியார்களின் தகாத உறவால் பாதிக்கப்பட்டவர்களுக்கும், தேவாலய நிர்வாகிகளுக்கும் அவர் சமீபத்தில் மன்னிப்பு கடிதம் எழுதியுள்ளார்.

அந்தக் கடிதத்தில், “பாதிரியார்கள் தாங்கள் செய்த செயலை ஒப்புக்கொள்ள வேண்டும். இந்த செயல்கள் உங்கள் மதிப்பின் தரத்தை தாழ்த்தக்கூடியது. இந்த தகாத செயலால் பாதிக்கப்பட்டவர்களிடம் மன்னிப்பு கேட்கிறேன்.

பாதிக்கப்பட்ட உங்களுக்கு நேர்ந்த இந்த துயரம் குறித்து வெட்கமும் வேதனையும் அடைகிறோம். அயர்லாந்து நாட்டு பாதிரியார்கள் செய்த துரோக செயல் குறித்து விசாரிக்கப்படும். அயர்லாந்து மக்கள், தேவாலயங்கள் மீது மீண்டும் நம்பிக்கை கொள்ளும் வகையில் நடவடிக்கை எடுக்கப்படும்” என்றார்.

நேற்று முன்தினம் அயர்லாந்தில் நடந்த கூட்டத்தில் கார்டினல் சீன் பிராடி, போப்பின் கடிதத்தை படித்துக் காண்பித்தார். அப்போது அவர் குறிப்பிடுகையில், “போப்பின் கடிதம் வரவேற்கத்தக்கது. அவர் குறிப்பிட்டுள்ளது போல், நடந்த சம்பவங்கள் குறித்து விசாரணை நடத்தப்படும்.தேவைப்பட்டால் ஒழுங்கு நடவடிக்கை எடுக்கப்படும்” , என்றார்.

ஆனால் இந்தக் கடிதம் சமாதானத்துக்கு பதில் சில புதிய சர்ச்சைகளை ஏற்படுத்தியுள்ளன.   இந்தக் கடிதம் அயர்லாந்துக்குதானே… மற்ற நாடுகளில் நடந்த பாலியல் கொடுமைக்கு என்ன தீர்வு? வெறும் மன்னிப்பு என்ன நிவாரணத்தைத் தரும்?

இந்த தீச்செயல்களைச் செய்த பாதிரிமார்களுக்கு என்ன சட்ட தண்டனை..? தவறு செய்த பாதிரியார்களை பதவி விலக வற்புறுத்தும்படி போப் இந்த கடிதத்தில் தெரிவிக்காதது ஏன்?

மதம் மற்றும் புனிதத்தின் பெயரால்,  இழிவான செயலைச் செய்துவிட்டு தேவாலயத்தின் பின்னால் ஒளிந்து கொள்வோரை எப்படி தண்டிக்கப் போகிறார் போப் என்று ஜெர்மனி மற்றும் சுவிட்ஸர்லாந்து நாடுகளின் கத்தோலிக்க குருமார்கள் சிலரே திருப்பிக் கேட்கிறார்கள்.

அதற்கு இதுவரை போப் தரப்பிலிருந்து பதில் இல்லை.. சொல்வாரா என்பதும் தெரியவில்லை

From → Uncategorized

பின்னூட்டமொன்றை இடுங்கள்

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s

%d bloggers like this: